ភ្នំពេញ៖ រយៈពេល ១០ខែ ឆ្នាំ២០២២ កម្ពុជាបាននាំចេញអង្ករទៅទីផ្សារក្រៅប្រទេសជិត ៥១ម៉ឺនតោន គឺកើនឡើងចំនួន ១០,៦៧ភាគរយ បើធៀបនឹងរយៈពេល ១០ខែ ឆ្នាំ២០២១ ដែលមានចំនួនជាង ៤៦ម៉ឺនតោន។

តាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បរិមាណអង្ករកម្ពុជាដែលនាំចេញទៅទីផ្សារអន្តរជាតិរយៈពេល ១០ខែនេះ គឺកម្ពុជានាំចេញទៅទិសដៅសហភាពអឺរ៉ុបចំនួន ២៣ប្រទេសចំនួនជាង ១៦ម៉ឺនតោន គឺកើនឡើង ៤៣,៤៣ភាគរយ។ ចិនជាប្រទេសដែលនាំចូលអង្ករពីកម្ពុជាច្រើនជាងគេគឺជាង ២៣ម៉ឺនតោន គឺកើនឡើង ១,១៨ភាគរយ។

សម្រាប់នាំចេញទៅទិសដៅអាស៊ានចំនួន ៤ប្រទេស មានបរិមាណសរុបចំនួនជិត ៥ម៉ឺនតោន កើនឡើង ១០,១៩ភាគរយ។ ការនាំចេញទៅ ២៦ប្រទេសទៀតមានបរិមាណសរុបជាង ៦ម៉ឺនតោន គឺថយចុះ-១១,៤៨ភាគរយ។

អង្កររបស់ក្រុមហ៊ុនចំនួន ៥៥ទៀត ក៏បាននាំចេញទៅក្រុមហ៊ុនក្រៅប្រទេសធំៗចំនួន១០ មានបរិមាណជាង ៣៤ម៉ឺនតោន និងក្រុមហ៊ុនចំនួន ៤៥ដទៃទៀតចំនួនជាង ១៦ម៉ឺនតោន។

ប្រភេទអង្ករដែលកម្ពុជានាំចេញទៅទីផ្សារអន្តរជាតិ មានអង្ករក្រអូប (ផ្ការំដួល និងផ្លាម្លិះជាដើម) អង្ករចំហុយ និងអង្ករសគ្រប់ប្រភេទ៕